Кормандони пулис Мавҷигул Ғарибова, модари Ҷунайдулло Худоёров, як корбари фаъоли шабакаҳои иҷтимоиро, ки дар зиндон ба сар мебарад, нагузоштаанд дар мулоқот бо президент Эмомалӣ Раҳмон иштирок кунад ва ӯро боздошт карданд ва танҳо пас аз 6 соат озод намуданд.

Бино ба иттилои Бахши хабарии Осиёи Марказӣ, Мавҷигул Ғарибова изҳор доштааст, ки соати панҷи субҳи рӯзи чаҳоршанбе ӯву ду тан аз наздиконашро аз миёни пешвозгирандагони президент дар шаҳраки Навободи Рашт ҷудо карда, ба идораи пулис бурданд.

Наздикони Мавҷигул Ғарибова гуфтаанд, ӯ танҳо мехост аз ноҳақ зиндонӣ шудани писараш ба президент шикоят кунад. Мақомоти пулис дар ноҳияи Рашт то ба ҳол сабаби боздошти Мавҷигул Ғарибоваро шарҳ надодаанд.

Мавҷигул Ғарибова субҳи 26-уми июн гуфтааст, қасд дошт ҳамроҳи мардуми Рашт ба пешвози президент барояд, аммо ба хотири он, ки дар бораи фарзандаш суоле матраҳ накунад, аз сӯи мақомоти интизомӣ боздошт шуд.

Наздикони Мавҷигул Ғарибова гуфтаанд, дар соатҳое, ки раисҷумҳур дар шаҳраки Навобод қарор дошт, ин занро мақомоти маҳаллӣ дар идораи пулис дар боздошт нигоҳ медоштанд. Мавҷигул Ғарибова субҳи бармаҳали 26-уми июн аз дохили боздоштгоҳи пулис гуфт, "ман нияти суол кардан надоштам, лекин инҳо (манзур кормандони пулис - РО) маро аз байни мардум боздошт карданд ва дар милисахона маҳкам намуданд".

Фарҳод Худоёров, фарзанди Мавҷигул Ғарибова мегӯяд, модараш ба президент мактуб дошт ва мехост онро ба Эмомалӣ Раҳмон супорад. Дар мактуби худ Мавҷигул Ғарибова навиштааст, "фарзандони ман ҳар кадоме ба алоҳидагӣ ба номи Шумо ва дигар мақомоти баландпояи давлатӣ номаҳо навиштанд, ки ба мо ёрӣ диҳед, аммо то ҳол барои озод кардани фарзанди бегуноҳи ман ҳеч амале сурат нагирифтааст".

Ин сокини Рашт дар мактубаш ҳамчунин навишт, ки писараш Ҷунайдулло Худоёров барои ифшои касоне иқдом кард, ки моли давлатро ғорат карданд. Аммо дар ниҳоят ба навиштаи хонум Ғарибова, писараш бо туҳмат ба панҷ соли зиндон маҳкум шуд. "Оё касе ҳаст, ки ба доди мо бирасад ва мусоидат кардаву писари бегуноҳи ман Ҷунайдуллоро озод кунад? Оё мумкин аст, ки одам бегуноҳ 5 соли ҳаёти худро дар зиндон сипарӣ кунад?"-навиштааст Мавҷигул Ғарибова.